請問點解d人要幫襯無牌小販?

無牌小販就係因為無牌, 擺擋的流動性高; 佢賣的貨品, 無論價錢或款式都較便宜及靈活, 花款較多, 咁先可以吸引到人們的注意, 做到唔買都有興趣去睇, 帶動起人流.
又因為羊群心理, 其他人會覺得, 有人鑽入去睇或者八卦的, 必然係有筍嘢或者特別的事, 人云亦云的關係, 自然都會參與其中. 一般來講, 無牌小販因為唔使舖租或燈油火蠟的雜項開銷, 就算貨色普通, 都可以有議價空間或下調機會. 呢個亦係捉到普通人心想得到著數, 貪便宜本色的心理學技巧.
另一樣係, 無牌小販因為冇固定地點, 亦非準時出現, 呢個point其實都幾捉到人心理架; 好似要捉迷藏咁. 你總係唔知佢幾時出現, 出現時又會唔會有新貨, 令人總係有種期望, 希冀有突破或驚喜的情況出現. 又或者, 今日唔買住要考慮, 到聽日佢已經賣晒, 想買都難. 於是, d人就會有買趁手, 唔買多都買少少, 點都叫做有少少戰利品嘛.
如果係食物的, 例如魚蛋, 明知無保障, 無牌喎, 咁點解仲要幫襯呢? 其實, 隨便係街買嘢食, 都係貪方便唔使四圍搵; 有時純粹係一種個人衝動, 冇動機架, 只係一時興起, 想食就食之嘛. 咁啱見到有檔賣魚蛋的, 咪買一串過吓癮咁解囉, 並冇想過衛生與否的問題.
另外, 亦關乎教育問題. 好似我細個咁, 屋企唔係咁管得好嚴, 只係勸喻唔好食街邊嘢, 學校就惡d, 老師成日都提著. 到我大個咗, 習慣成自然, 都好少幫襯街邊檔架, 除咗貪過癮囉.
有一個幫襯無牌熟食的理由; 呢d真係講風味架. 企係街邊食嘢雖然唔係咁好睇, 但係, 趁新鮮即食好有風味; 放入膠袋, 返到屋企或拎入室內先食, 個mood真係冇咁好, 興緻都會down好多. 而且, 有時d街邊檔亦係用別具特色的gimmick來吸引人, 好似秘製咖哩呀, 家傳巧手呀咁. 唔好理會背後的實況, 單純講個食味, 有時, 真係連名店都比唔上架.
所以, 無牌小販有佢的生存理由的.

一般人的心態，購物但求方便又便宜，懶理是有牌定無牌，因小販唔使交租，心理上覺得一定此店鋪平。