揸的士問題

新仔最好唔好逞強同人客拗，反而主動同個客講自己係新手或替工，唔係太熟路，請佢幫忙帶一帶路，客人通常都好樂意幫手，因為此舉都幫到佢慳錢，一家便宜兩家著嘛！

同埋開工最緊要帶定本街道圖，停燈時即刻拎出來睇睇惡補，慢慢就會識路；當遇著客人又唔識路時，即刻打俾相熟行家或用對講機問問Call台台姐台妹搵人教路一樣得。

其實旅發局都出o左一本的士司機手冊，入面有好多酒店、旅遊點、商場、領事館的地址資料，並用中、英、日、韓文刊載，若旅客要去呢o的地方，可以拎俾佢睇睇，咁亦方便好多，呢本書仔可以上的士台度索取，唔使錢o架！

另外有好多酒店都會改名，怕唔記得就要Mark低新舊名稱的對照，例如太子的京港、何文田窩打老道的京華，今時今日都改o左名叫維景，所以要問清楚係邊一間；此外，富豪、仕德福、聖地牙哥都有好幾間，乘客話去呢o的地方真係要問清楚o架。

有些客人會去一些好長的街道，好似漆咸道咁，咁就要問埋大廈名或門牌，因為唔同位置行法有可能唔同，知道係邊一段就唔使o係條街度慢駛逐個門牌搵或行錯路段及方向；舉個例子，由尖沙咀去土瓜灣北帝街，如果目的地係近上鄉道那邊的，就唔可以行東九龍走廊，而要行漆咸道、浙江街、下鄉道、落山道o個邊去；但如果係去近馬頭角道至傲雲峰那邊的北帝街，就應該行東九龍走廊，九龍城道及馬頭角道那邊去，因為會少o的燈位及快好多。

又如遇著你都知有兩條路係差唔多，可以問佢鍾意行邊一條，因為就算因為咁而塞車或最後真係貴o左，個責任已不在你身上。還有就是有機會要行付款的隧道，特別是過海隧道，如果有兩條路程都差唔多，最好都問一問，如中環去東九龍，有人會行紅隧、有人會行東隧；或客人在佐敦一帶上車過海，都分別有人揀行紅隧或西隧的，都最好問一問佢，以免一旦行o左條佢唔合心意的隧道（有人想快、亦有人想慳隧道費）而產生爭拗就唔好啦！

祝你一路順風、客似雲來！

(1)　問明個客去邊，知道點去咪照行，（但都同佢講聲新手，唔多識路）；唔知就同個客講（新手，唔係好識路，叫佢帶一帶點行），通常冇咋型既．自己最緊要知道Ｄhighway點行就ok．連highway都唔識就唔好揸住，一定要清楚架．
(2)　除身地圖，得閒就睇，唔得閒都要睇，去到Ｄ新既地方就攞出來睇，睇下會唔會有第二條路快Ｄ，好行Ｄ，小Ｄ燈之類，咁自然識路架啦．
(3)　揸的士唔會有絕對正確既路線，到你好叻既時候，其實個客仲叻個你都有架，除住時間學習，最主要記性要好．

2006-10-28 14:25:12 補充：
(4)　開始開工最好搵Ｄ自己熟既地方，咁會比較好，由淺入深．