電單車幾耐揸一次及維修保養問題...

以前我返工會用電單車，因為有地方可以泊，同埋真係慳到時間，而油費加埋日常維修保養等成本，就同我搭巴士返工差唔多。不過由於轉業的關係，架車就真係擺多過用，但都要間中開一開佢，最少一星期一次到啦！否則驚架車無電就麻煩，除非架車有腳撻就無有怕，但開一開佢等o的偈油行o下都係好o既；如果諗住長時間唔用，最好將舊電o既電線拔出，待要用車時又接返佢，咁舊電就唔會咁快走晒o的電啦！不過以前我去邊都幾乎會用，只係天氣太惡劣時才唔開車，始終落雨開電單車都係比較危險。

一般細過250cc的電單車，我會約1000至1500km就會換偈油，大cc都係2000km到就去換，換得密o的對副偈都好o的，架車會耐用些，而且換油都只係百幾二百蚊，如果用量唔高，都唔係使得幾多。

至於其他維修項目，例如車鏈（街車類）或傳動皮帶和普利珠、珠盤（自動羊）要定期檢查及更換、尾牙油的補充、電池、輪胎的更換，這些消耗品都是要留意的，不過有些壽命較長，有些較短，所以每次的費用未必一樣，但每月預三幾百元內（未計入油錢）一般都夠用有餘，除非諗住將架車大改就唔同計法，但相對坐公共交通工具，電單車都算係經濟的。