如何教小朋友

小朋友不會了解妳在跟她一起面對功課，她只是感到她在做一些她不明白的東西，和感到妳給她壓力。我的表妹今年小三，雖然不是經常看見她，但每次到她的家(我耐唔耐都會去佢屋企幫佢地整電腦)，我姨丈好惡咁對住佢，我睇到都覺得驚。
我講下我以前點樣教細佬做功課(我細佬細我十一年，佢而家已經讀中三)

小一做中文，多數都係寫生字，小朋友隻手未夠力，所以寫d仔唔係太好，唔可以用自己既角度去睇，最緊要係個字型比例0岩就ok，例如個『驚』字，呢d字對於小朋友黎講太多筆畫，個字太大，所以好多時個『敬』字寫到好大，個『馬』字好細，只要睇到d筆畫清楚，其實已經可以收貨。同埋等佢做晒之後，先至將佢寫得真係唔好果d擦左佢，如果佢一寫得唔好即使叫佢擦，寫完又擦，擦完又寫，妳睇得煩之餘，佢又做到喊。簡單d講就係d筆畫清楚，同埋唔好出界就ok。

做英文，佢可能要寫copy book，或者寫句子，理論同中文一樣，只要個字寫返在雙行線之間就可以。因為我唔記得小一英文學Grammer未，到佢學he, she, it 果陣，我會用男仔、女仔、動物去教，用咩『第三身單數』果d名詞佢地唔會明。

數學比較麻煩d，小一都係學d加減數，當初我都係用數手指，但係我想佢學心算，我教佢玩廿一點，對於部份人黎講可能唔係咁好，話怕教小朋友賭錢，小朋友唔知道廿一點，佢地只係當遊戲咁玩。計減數我會用糖(一盒有好多粒果d)例如叫佢計9-4, 我會叫佢拿九粒出黎，就係叫佢一粒一粒咁拿，一、二、三....九，之後叫佢放番四粒入個盒到(又係叫佢一粒一粒咁拿)，再問佢台面仲有幾多粒。記住要佢自己拿，俾佢有一個參與感，對佢黎講可能係遊戲。

我唔係好記得小一會教d咩，但係希望呢d方法可以俾妳參考下。
教小朋友要有耐性，因為小一既小朋友仲未知道佢在做功課
有時間可以陪佢玩下遊戲，果陣我成日陪佢玩大富翁、教佢玩象棋....
如果係女仔，我諗玩下波子棋或者整下d小手工，培養感情真係好重要，因為會影響佢將來對妳既信任。

最好叫佢講一次俾你聽，你就知他明唔明或者邊度唔明。小一學生最好用遊戲方式學習，例如字咭、圖象等，必可事半功倍。